KUNĊERT MILL-ALLJIEVI TAL-BANDA
Il-bieraħ assistejna għal kunċert mill-alljievi tal-Banda Ċittadina La Stella li xxandar fuq il-Facebook Page tagħna. Prosit tassew lil dawk kollha li ħadu sehem, l-għalliema George Camilleri, Michael Bonanno u Mario Galea, il-preżentazzjoni ta’ Andrea Camilleri, u dawk kollha li ħadmu minn wara l-kwinti fuq is-sound, filmati u l-produzzjoni. Ta’ min jgħid grazzi u prosit ukoll lill-kumitat tas-Soċjetà tagħna, li minkejja d-diffikultajiet li ġabet magħha l-pandemija, dejjem żamm lill-istudenti fiċ-ċentru tal-attività.
F’dawn l-aħħar tliet snin ġiet organizzata struttura fit-tagħlim fi ħdan l-iskola tal-mużika tal-Banda Ċittadina La Stella, b’investiment fir-riżorsi u strutturi fejn isir it-tagħlim. Il-każin għandu klassi speċjali mgħammra b’kollox. Il-ħidma tal-iskola tal-mużika hi kkordinata minn working group immexxi mill-President tas-Soċjetà La Stella u jinkludi wkoll lill-għalliema u s-Surmast.
