SUĊĊESS KBIR FL-EWWEL RAPPREŻENTAZZJONI TA’ OTELLO

It-Teatru Astra l-bieraħ filgħaxija rreġistra suċċess ieħor bil-produzzjoni operistika ta’ Giuseppe Verdi Otello.  F’teatru ppakkjat bin-nies, wara li aktar kmieni matul il-jum ġie mħabbar li s-serata kienet Fully-Booked, in-nies preżenti setgħu jitpaxxew b’eżekuzzjoni mill-aqwa f’dak kollu li għandu x’jaqsam mal-opra.

L-Orkestra Nazzjonali ta’ Malta, taħt id-direzzjoni tas-Surmast Prof. Joseph Vella u t-team artistiku taħt id-direzzjoni ta’ Enrico Stinchelli, paxxew l-udjenza kemm f’dik li hija mużika u kant kif ukoll f’dak li għandu x’jaqsam max-xenarju, dwal, kostumi eċċ.  Ta’ min isemmi wkoll s-sehem tal-kantanti, kemm dawk barranin, kif ukoll dawk Maltin li nterpretaw tajjeb ħafna r-rwoli tagħhom.

Dan kollu jawgura tajjeb għar-rappreżentazzjoni tas-Sibt li ġej.  Baqa’ biss ftit postijiet disponibbli.  Min hu nteressat għandu jċempel minnufih fuq 79256897.

Intant illum ser ikun hemm attività oħra ta’ Festival Mediterranea – Guided Tour of the Ħaġar Museum and a site visit to St George’s Basilica.  Min hu nteressat jrid imur fi Pjazza San Ġorġ, quddiem il-bieb prinċipali tal-Bażilika f’nofsinhar (12.00hrs). Il-biljetti għal din l-attività jiswew €3.

Għada filgħodu, fl-9.30 se jkollna attività li teħodna fil-qalba tal-kampanja Għawdxija, A Genuine Taste of Gozo – A visit to Ta’ Mena Estates.  Trasport jitlaq minn quddiem it-Teatru Astra fl-9.45hrs. Biljetti €12.

Aktar tagħrif fuq www.mediterranea.com.mt

(Ritratt: Joe Attard)