STAĠUN TEATRALI MILL-AKTAR IMPENJATTIV FIT-TEATRU ASTRA
L-istaġun teatrali fit-Teatru Astra 2023/2024 kien wieħed ferm impenjattiv. Minbarra l-opra Rigoletto f’Ottubru li għadda, it-teatru ospita fih numru ta’ kunċerti mużikali, fosthom dak tal-Banda Ċittadina La Stella f’Novembru li għadda, numru ta’ kunċerti tal-iskejjel f’Għawdex fi żmien il-Milied u l-pantomina tal-Milied Aladdin. Kif bdiet is-sena kellna wkoll il-konkors Kantamagħna u f’Marzu 2024 rekord ta’ sitt rappreżentazzjonjiet tal-musical West Side Story.
Imma l-istaġun teatrali ma waqafx hawn. Minn hawn u ftit ġimgħat oħra se ssir għall-ewwel darba l-opra tal-Prof. Joseph Vella, Valeriana, sewwasew fl-4 ta’ Mejju 2024, taħt id-direzzjoni artistika ta’ Denise Mulholland u dik mużikali ta’ Mro Christopher Muscat (li ikkompona l-aħħar parti tal-opra), u ftit wara, se jkun hemm il-kunċert Feel the Magic of Orchestral Progressive Rock, mtella mill-Chorus Urbanus taħt id-direzzjoni mużikali ta’ Mro Dr John Galea. Fil-31 ta’ Mejju 2024 għadu kif ġie imħabbar il-kunċert RockAstra – Glam Rock Edition bis-sehem tal-Banda Ċittadina u Dekana La Stella, li din is-sena se jsir ukoll ġewwa t-Teatru Astra u se jkun ukoll taħt id-direzzjoni ta’ Mro Dr John Galea. Dritt wara, fl-14 ta’ Ġunju 2024, għal darba oħra it-Teatru Astra se jkun il-venue tal-kunċert inawgurali tal-Victoria International Arts Festival taħt id-direzzjoni mużikali ta’ Mro Philip Walsh.
Wara s-sajf, fejn jibda staġun teatrali ieħor ġa hemm imħabbra events oħra importanti, fosthom l-opra Giovanna d’Arco ta’ Giuseppe Verdi, taħt id-direzzjoni mużikali ta’ Mro Dr John Galea u dik artistika ta’ Enrico Stinchelli, u f’Novembru kunċert operistiku Puccini 100 Anniversary Concert taħt id-direzzjoni ta’ Mro Joseph Debrincat imtella mill-The Classique Foundation. Ta’ min isemmi li dawn l-appuntamenti teatrali kollha, bl-eċċezzjoni ta’ RockAstra, se jkunu kollha bis-sehem tal-Orkestra Nazzjonali ta’ Malta.
Kif wieħed jista’ jinnota għal qabel il-waqfa tas-sajf u hekk kif jerġa jiftaħ wara s-sajf, it-teatru ġa għandu programm ferm impejattiv. Dan huwa possibbli għax it-Teatru Astra huwa mogħni b’tim dedikat, li jaħdem is-sena kollha fuq dawn il-produzzjonijiet. Li kieku ma jkunx għall-volontarjat ta’ dawn il-membri kieku dawn il-produzzjonijiet ma jkunux jistgħu jsiru.
It-Teatru Astra huwa kburi li minkejja dawn l-impenji kollha rnexxielu wkoll ikompli għaddej bi proġetti ta’ rinnovar u tiġdid f’kull dipartiment tat-teatru u fil-faċililtajiet anċillari. Huwa appuntu dan li jżomm ħaj it-teatru, l-attività kontinwa li qegħda żżomm lit-Teatru Astra bħala wieħed miċ-ċentri kulturali f’pajjiżna.
Segwu d-dettalji ukoll fuq il-website uffiċjali tat-teatru teatruastra.org.mt li permezz tagħha wieħed jista’ jibbukkja għal dawn il-produzzjonijiet. Xi wħud minnhom ġa għandhom il-booking miftuħ filwaqt li għal oħrajn il-booking se jiftaħ fil-jiem li ġejjin.
